ಶ್ರೇಷ್ಟತೆಯ ಹುಡುಕಾಟದಲ್ಲಿ ಗೋಡೆಗಳ ಜಂಜಾಟ!

ಚುನಾವಣಾ ಪೂರ್ವದಲ್ಲಿ ಡೊನಾಲ್ಡ್ ಟ್ರಂಪ್ ಆಡಿದ ಮಾತುಗಳೆಲ್ಲವೂ ಅನುಷ್ಟಾನಕ್ಕಿಳಿಯುವುದಿಲ್ಲ ಎಂದು ನಂಬಿಕೆ ನಿಧಾನವಾಗಿ ಕರಗುತ್ತಿದೆ. ಟ್ರಂಪ್ ತಾನಾಡಿದ ಪ್ರತಿ ಮಾತನ್ನೂ ಅನುಷ್ಟಾನಕ್ಕಿಳಿಸುವ ಉತ್ಸಾಹದಲ್ಲಿರುವುದು, ಅಧಿಕಾರಾವಧಿಯ ಪ್ರಾರಂಭಿಕ ವಾರಗಳಲ್ಲೇ ಸ್ಪಷ್ಟವಾಗಿದೆ. 'ಅಮೆರಿಕಾ ಮೊದಲು' ಎಂಬ ಪರಿಕಲ್ಪನೆಯಿಂದ ಪ್ರಭಾವಿತರಾಗಿ ಟ್ರಂಪ್ ಇತರ ದೇಶಗಳನ್ನು ಸಾಧ್ಯವಾದಷ್ಟು ದೂರವಿಡಲು ಪ್ರಯತ್ನಿಸುತ್ತಿರುವುದೂ ರಹಸ್ಯವಾಗಿ ಉಳಿದಿಲ್ಲ. ವಿಭಿನ್ನ ಕಾರಣಗಳಿಗೋಸ್ಕರ ಅಮೆರಿಕಾ ಪ್ರವೇಶಿಸುವ ಇತರ ದೇಶಗಳ ವಲಸಿಗರಿಗೆ ಬಾಗಿಲು ಮುಚ್ಚುವ ಪ್ರಕ್ರಿಯೆ ಈಗಾಗಲೇ ತುಂಬಾ ದೊಡ್ಡ ಮಟ್ಟದಲ್ಲಿ ಆರಂಭವಾಗಿದೆ. ಇತ್ತೀಚೆಗೆ ಎಬಿಸಿ ನ್ಯೂಸ್ ಗೆ ನೀಡಿದ ಸಂದರ್ಶನದಲ್ಲಿ ಟ್ರಂಪ್ ರವರೇ ತಮ್ಮ ಗುರಿ, ಅಮೆರಿಕಾದೊಳಗೆ ಬರಲು ಬಯಸುವವರನ್ನು ತಡೆದು ಭೌತಿಕ ಮತ್ತು ಮಾನಸಿಕ ಗೋಡೆಗಳನ್ನು ನಿರ್ಮಿಸುವುದು ಎನ್ನುವುದನ್ನು ಒಪ್ಪಿಕೊಂಡಿದ್ದಾರೆ. ಇಲ್ಲಿಯವರೆಗೆ ಅಮೆರಿಕಾದೊಳಗೆ ಪ್ರವೇಶ ಪಡೆದುಕೊಳ್ಳುವುದು ಅತ್ಯಂತ ಸುಲಭದ ಕೆಲಸವಾಗಿತ್ತು ಎಂದಿರುವ ಟ್ರಂಪ್, ಮುಂದಕ್ಕೆ ಅಮೆರಿಕಾ ಪ್ರವೇಶ ಅತ್ಯಂತ ಕಷ್ಟಕರ ಪ್ರಕ್ರಿಯೆಯಾಗಲಿದೆ ಎಂಬ ಎಚ್ಚರಿಕೆಯ ಸಂದೇಶವನ್ನೂ ರವಾನಿಸಿದ್ದಾರೆ.

ವ್ಯಕ್ತಿ, ಸಮುದಾಯ ಅಥವಾ ರಾಷ್ಟ್ರ ಶ್ರೇಷ್ಟತೆಯತ್ತ ಸಾಗಬೇಕಾದಲ್ಲಿ ಎಲ್ಲರನ್ನೂ ಒಪ್ಪಿಕೊಂಡು ಮಾನವ ಕುಲದ ಸಹೋದರತೆಯನ್ನು ಪ್ರತಿಪಾದಿಸಬೇಕೇ ವಿನಃ ದೃಷ್ಟಿಕೋನಗಳನ್ನು ಸಂಕುಚಿತಗೊಳಿಸುವ ಗೋಡೆಗಳ ನಿರ್ಮಾಣದಲ್ಲಿ ಸಮಯ ವ್ಯರ್ಥ ಮಾಡುವುದು ಸರ್ವಥಾ ಸರಿಯಲ್ಲ. ಇವತ್ತಿಗೆ ಮೆಕ್ಸಿಕೊ ಗಡಿಯಲ್ಲಿ ಟ್ರಂಪ್ ಕಟ್ಟ ಹೊರಟಿರುವ ಭೌತಿಕ ಗಡಿ ಗೋಡೆ, ಕೆಲ ದೇಶಗಳ ನಾಗರಿಕರು ಅಮೆರಿಕಾ ಪ್ರವೇಶಿಸದಂತೆ ಹೊರಡಿಸಿರುವ ಸುಗ್ರೀವಾಜ್ಞೆ ನಮ್ಮೆಲ್ಲರಿಗೂ ಗೋಚರವಾಗಿರುವ ಮತ್ತು ಚರ್ಚೆಗೊಳಗಾಗಿರುವ ವಿಷಯ. ಕಣ್ಣಿಗೆ ಕಾಣುವ ಭೌತಿಕ ಗೋಡೆಗಳನ್ನು ಮುಂದೊಂದು ದಿನ ಕೆಡವಬಹುದಾದರೂ, ಟ್ರಂಪ್ ನಿರ್ಮಿಸುತ್ತಿರುವ ಮಾನಸಿಕ ಗೋಡೆಗಳು ಅಂತರಾಷ್ಟ್ರೀಯ ವ್ಯವಸ್ಥೆಯ ಮೇಲೆ ಅನಾರೋಗ್ಯಕರ ಪರಿಣಾಮ ಬೀರುವುದು ಖಂಡಿತ. ಪ್ರಥಮ ಮಹಾಯುದ್ಧಕ್ಕೂ ಮೊದಲು ಅಮೆರಿಕಾ ದಶಕಗಳ ಕಾಲ ಹೊರಜಗತ್ತಿನಿಂದ ದೂರವಾಗಿ 'ಭವ್ಯ ಏಕಾಂತದ ತತ್ವ' (Splendid Isolationaism) ಪಾಲಿಸಿತ್ತಾದರೂ, ಏಕಾಂತದ ಗಾಂಭೀರ್ಯತೆಯನ್ನು ಆಗಿನ ಅಮೆರಿಕನ್ ವ್ಯವಸ್ಥೆ ಕಾಪಾಡಿಕೊಂಡಿತ್ತು ಬಂದಿತ್ತು ಎನ್ನುವುದು ಗಮನಾರ್ಹ. ಇವಿಷ್ಟೇ ಅಲ್ಲದೇ ಅಮೆರಿಕಾವನ್ನು ದಿಗ್ಬಂಧನಕ್ಕೊಳಪಡಿಸಿ ಪ್ರವೇಶ ನಿಷೇಧಿಸುವ ಟ್ರಂಪ್ ಯೋಜನೆಗಳಲ್ಲಿ ಆ ಗಾಂಭೀರ್ಯತೆಗಳಿಲ್ಲ ಎಂಬ ವಿಚಾರವನ್ನು ಅಮೆರಿಕಾದ ಪ್ರಖ್ಯಾತ ವಿಶ್ಲೇಷಕರು ಒಪ್ಪಿಕೊಂಡಿದ್ದಾರೆ

ಮೆಕ್ಸಿಕೊದಿಂದ ಅಮೆರಿಕಾಗೆ ಬರುವ ವಲಸಿಗರನ್ನು ತಡೆಯಲು ಮೆಕ್ಸಿಕೊ ಮತ್ತು ಅಮೆರಿಕಾದ ಸಂಯುಕ್ತ ಸಂಸ್ಥಾನದ ಗಡಿಯಲ್ಲಿ ಗೋಡೆಯೊಂದನ್ನು ನಿರ್ಮಿಸಬೇಕು ಮತ್ತು ನಿರ್ಮಾಣದ ಸಂಪೂರ್ಣ ವೆಚ್ಚವನ್ನು ಮೆಕ್ಸಿಕೊ ಭರಿಸಬೇಕು ಎಂದು ಚುನಾವಣಾ ಪ್ರಚಾರದಲ್ಲೇ ಟ್ರಂಪ್ ಎಚ್ಚರಿಕೆ ನೀಡಿದ್ದರು. ಅಧ್ಯಕ್ಷನಾದ ಬಳಿಕವೂ ತನ್ನ ನಿಲುವಲ್ಲಿ ಕಿಂಚಿತ್ತೂ ಬದಲಾವಣೆ ಮಾಡಿಕೊಳ್ಳದ ಟ್ರಂಪ್ ಗಡಿಯಲ್ಲಿ ಗೋಡೆ ಕಟ್ಟುವಂತೆ ಮೆಕ್ಸಿಕೊಗೆ ತಾಕೀತು ಮಾಡಿದ್ದಾರೆ. ಇದಿಷ್ಟೇ ಅಲ್ಲದೆ ಸಿರಿಯಾ, ಇರಾನ್, ಇರಾಕ್, ಲಿಬಿಯಾ, ಸೊಮಾಲಿಯಾ, ಸುಡಾನ್ ಮತ್ತು ಯೆಮೆನ್ ಗಳ ಜನ ಅಮೆರಿಕಾದತ್ತ ವಲಸೆ ಬರುವುದನ್ನು ನಿಷೇಧಿಸಿ ಸುಗ್ರೀವಾಜ್ಞೆ ಹೊರಡಿಸಿದ್ದ ಟ್ರಂಪ್ ನಡೆ ವ್ಯಾಪಕ ಟೀಕೆಗೆ ಗ್ರಾಸವಾಗಿ ಕೊನೆಗೆ ಟ್ರಂಪ್ ಮುಖಭಂಗ ಅನುಭವಿಸಬೇಕಾಯ್ತು. ಇಷ್ಟಕ್ಕೂ ದೇಶದ ಸುತ್ತ ಗೋಡೆ ಕಟ್ಟಿಕೊಂಡು ಅಮೆರಿಕಾ ಸಾಧಿಸಬೇಕಾಗಿರುವುದಾದರೂ ಏನು? ಈ ಭೌತಿಕ ಮತ್ತು ಮಾನಸಿಕ ಗೋಡೆಗಳ ನಿರ್ಮಾಣದಿಂದ ಟ್ರಂಪ್ ಗಳಿಸುವುವ ಪರಮಾರ್ಥವಾದರೂ ಏನು? ಎಂಬ ಪ್ರಶ್ನೆಗಳು ಎಲ್ಲರನ್ನೂ ಕಾಡುತ್ತದೆ. ಅಂಕಿ ಅಂಶಗಳನ್ನೇ ಆಧಾರವಾಗಿಟ್ಟುಕೊಂಡು ನೋಡುವುದಾದರೆ, 1975ರಿಂದ ಅಮೆರಿಕಾದ ಮಣ್ಣಿನಲ್ಲಿ ಸಂಭವಿಸಿದ ಉಗ್ರ ದಾಳಿಗಳಲ್ಲಿ ನಿಷೇಧಕ್ಕೊಳಗಾದ ಏಳು ರಾಷ್ಟ್ರಗಳ ಪಾತ್ರ ಲವಲೇಶವೂ ಇಲ್ಲ ಮತ್ತು ಈ ದೇಶಗಳ ವಲಸಿಗರು ಒಬ್ಬ ಅಮೆರಿಕನ್ನನ ಸಾವಿಗೂ ಕಾರಣರಾಗಿಲ್ಲ! ಅಚ್ಚರಿಯ ವಿಷಯವೇನೆಂದರೆ ಉಗ್ರ ಚಟುವಟಿಕೆಗಳಿಗೆ ಪ್ರತ್ಯಕ್ಷವಾಗಿಯೋ ಅಥವಾ ಪರೋಕ್ಷವಾಗಿಯೋ ಕಾರಣಕರ್ತರಾದ ಸೌದಿ ಅರೇಬಿಯಾ, ಈಜಿಪ್ಟ್, ಪಾಕಿಸ್ತಾನ ಮತ್ತು ಯುಎಇ ನ ವಲಸಿಗರನ್ನು ಟ್ರಂಪ್ ನಿಷೇಧಿಸಿಲ್ಲ!

ಅಮೆರಿಕಾಗೆ ಹೊರಗಿನಿಂದ ಬರುವ ಜನರನ್ನು ತಡೆಯುವ  ನಿರ್ಧಾರದಿಂದ ನಾನು ಸಾವಿರಾರು ಅಮೆರಿಕನ್ನರ ಪ್ರಾಣ ಉಳಿಸುತ್ತಿದ್ದೇನೆ ಎನ್ನುತ್ತಿರುವ ಟ್ರಂಪ್ ಮಾತಿನಲ್ಲಿ ಸತ್ಯಕ್ಕಿಂತ ಜೊಳ್ಳೇ ಎದ್ದು ಕಾಣುತ್ತಿದೆ. ವಿದೇಶೀಯರು ಅಮೆರಿಕಾ ಭದ್ರತೆ ಮತ್ತು ಸುರಕ್ಷತೆಗೆ ಮಾರಕವಾಗುತ್ತಾರೆ ಎಂಬ ಮಾತಿಗೆ ಧೃಡವಾದ ಸಾಕ್ಷಿ ಆಧಾರಗಳಿಲ್ಲ. ಕ್ಯಾಟೊಸ್ ನೌರಾಸ್ಟೆಹ್ ಸರ್ವೇಯ ಪ್ರಕಾರ ಪ್ರತಿ ವರ್ಷ ಸಾವನ್ನಪ್ಪುವ 3.64 ಬಿಲಿಯನ್ ಅಮೆರಿಕನ್ನರಲ್ಲಿ ಒಬ್ಬ ಮಾತ್ರ ವಲಸಿಗರಿಂದ ಕೊಲ್ಲಲ್ಪಡುವ ಅವಕಾಶವಿರುತ್ತದೆ. ಅಮೆರಿಕಾದಲ್ಲಿ ವಲಸಿಗರು ಹಿಂಸಾತ್ಮಕ ಕೃತ್ಯಗಳಲ್ಲಿ ತೊಡಗಿಕೊಂಡಿರುವುದು ಕಡಿಮೆ ಎನ್ನುವುದನ್ನು ಸ್ಪಷ್ಟಪಡಿಸುತ್ತದೆ ದಾಖಲೆಗಳು. ಅಮೆರಿಕಾದ ಮಾಧ್ಯಮಗಳು ಕೂಡ ಅಮೆರಿಕಾದಲ್ಲೇ ಹುಟ್ಟಿ ಬೆಳೆದ ಪ್ರಜೆಗಳು ಮಾಡುವ ಹಿಂಸಾತ್ಮಕ ಅಪರಾಧಗಳಿಗೆ ಹೋಲಿಸಿದಲ್ಲಿ ವಲಸಿಗರು ಸಾವಿರ ಪಾಲು ವಾಸಿ ಎಂದು ಅಭಿಪ್ರಾಯ ಪಡುತ್ತವೆ. ವಲಸಿಗರು ಅಪಾಯಕಾರಿಗಳಲ್ಲ ಪುರಾವೆಗಳಿಗೆಲ್ಲಾ ಟ್ರಂಪ್ ಕೊಡುವ ಸಮರ್ಥನೆಗಳು ಅಡ್ಡಗೋಡೆಯ ಮೇಲೆ ದೀಪವಿಟ್ಟಂತಿವೆ.

ಹತ್ತೊಂಬತ್ತನೇ ಶತಮಾನದ ಕೊನೆಯಲ್ಲಿ ಮತ್ತು ಇಪ್ಪತ್ತನೇ ಶತಮಾನದ ಪ್ರಾರಂಭದಲ್ಲಿ ಸಹಸ್ರಾರು ಸಂಖ್ಯೆಯಲ್ಲಿ ಯಹೂದಿಗಳು ಅಮೆರಿಕಾದೊಳಗೆ ಪ್ರವೇಶ ಪಡೆದುಕೊಂಡಾಗ ಇಲ್ಲದ ಸಮಸ್ಯೆ ಇದೀಗ ಎದುರಾಗಿದೆ. ಅಮೆರಿಕಾ ಪ್ರಪ್ರಥಮ ಅಣ್ವಸ್ತ್ರ ಬಾಂಬ್ ನ ಸಂಶೋಧನೆಯಲ್ಲಿ ಬಹುಮುಖ್ಯ ಪಾತ್ರ ವಹಿಸಿದವರು ವಿದೇಶೀ ವಿಜ್ಞಾನಿಗಳೇ! ಅಮೆರಿಕಾ ಇವತ್ತು ಎದೆ ತಟ್ಟಿ ಹೇಳಿಕೊಳ್ಳುವ ಹಲವಾರು ಶ್ರೇಷ್ಟ ಅನ್ವೇಷಣೆಗಳ ಹಿಂದಿನ ರೂವಾರಿಗಳು, ಬೃಹತ್ ಕಂಪೆನಿಗಳ ಸೂತ್ರ ಹಿಡಿದು ಮುನ್ನಡೆಸಿದವರೆಲ್ಲರೂ ಎಲ್ಲಿದಲೋ ಅಮೆರಿಕಾಗೆ ಬಂದ ಪರದೇಶಿಗಳೇ ಎನ್ನುವುದನ್ನು ಟ್ರಂಪ್ ಮರೆತಂತಿದೆ. ಅಮೆರಿಕಾ ಸೇನೆಯಲ್ಲಿ ಕಾರ್ಯನಿರ್ವಹಿಸಿ ಪ್ರಾಣತ್ಯಾಗ ಮಾಡಿದ ಹಲವಾರು ಸೈನಿಕರು ಬೇರೆ ದೇಶದಿಂದ ವಲಸೆ ಬಂದವರು. ಆದರೆ ವಲಸಿಗರು ಅಮೆರಿಕಾಗೋಸ್ಕರ ಮಾಡಿದ ತ್ಯಾಗ ಮತ್ತು ಬಲಿದಾನಗಳನ್ನು, ವಲಸಿಗರೆಂಬ ಏಕೈಕ ಕಾರಣಕ್ಕೆ ಟ್ರಂಪ್ ಕಡೆಗಣಿಸಿದ್ದು ಕೃತಘ್ನತೆಯ ಪರಮಾವಧಿ.

ಶೀತಲ ಸಮರದುದ್ದಕ್ಕೂ ದ್ವೇಷ ಮತ್ತು ವೈರತ್ವಗಳಿಗೆ ಸಾಕ್ಷಿಯಂತಿದ್ದ ಬರ್ಲಿನ್ ಗೋಡೆಯನ್ನು ಕೆಡವಿ ಪೂರ್ವ ಮತ್ತು ಪಶ್ಚಿಮ ಜರ್ಮನಿಗಳನ್ನು ಒಂದಾಗುವಲ್ಲಿ ಪ್ರಮುಖ ಪಾತ್ರ ವಹಿಸಿದ ಅಮೆರಿಕಾದ ಮಾಜಿ ಅಧ್ಯಕ್ಷ ರೊನಾಲ್ಡ್ ರೇಗನ್ ಹೇಳುತ್ತಾರೆ, " ಶ್ರೇಷ್ಟ ಮತ್ತು ಶಕ್ತಿಶಾಲಿ ರಾಷ್ಟ್ರಗಳು ಗೋಡೆಗಳನ್ನು ಕಟ್ಟುವುದಿಲ್ಲ ಬದಲಿಗೆ ಗೋಡೆಗಳನ್ನು ನಾಶ ಮಾಡುತ್ತವೆ". ಹೌದು, ಗೋಡೆ ಕಟ್ಟಿಕೊಳ್ಳುವುದು ದುರ್ಬಲರು ಮತ್ತು ಕೀಳರಿಮೆಯುಳ್ಳವರ ಮನಸ್ಥಿತಿಯೇ ಹೊರತು ಬಲಿಷ್ಟರ ಸಾಧನವಲ್ಲ. ಇವೆಲ್ಲದರ ಮಧ್ಯೆ ಟ್ರಂಪ್ ಗಮನಿಸಬೇಕಾದ ಇನ್ನೊಂದು ವಿಷಯವಿದೆ, ಮುಂದೊಂದು ದಿನ ಟ್ರಂಪ್ ಕಟ್ಟಿಕೊಂಡ ಗೋಡೆಗಳನ್ನು ಕೆಡವಲು ಮನಸ್ಸು ಮಾಡಿದರೂ ಗೋಡೆಯಾಚೆಗಿನ ಮನಸ್ಸುಗಳು ಅಮೆರಿಕಾವನ್ನು ಒಪ್ಪಿಕೊಳ್ಳದೇ ಇರುವ ಸಾಧ್ಯತೆಯಿದೆ. ಗೋಡೆಗಳು ಯಾವುದೇ ದೇಶವನ್ನು ಶ್ರೇಷ್ಟತೆಯತ್ತ ಕೊಂಡೊಯ್ಯಲಾರವು ರೇಗನ್ ಮಾತುಗಳನ್ನು ಟ್ರಂಪ್ ಅರ್ಥೈಸಿಕೊಳ್ಳಬೇಕಿದೆ.

(This article was published in Varthabharathi Newsapaper on 22 February 2017)

      KEERTHIRAJ (prof.keerthiraj@gmail.com)

      

International Relations and Political Science

Alliance University, Bengaluru

ಜಾಗತಿಕ ರಾಜಕಾರಣದ ಹೊಸ ತಿರುವು

ವಿಶ್ವ ರಾಜಕೀಯದಲ್ಲಿ ಅಮೆರಿಕಾ ಮತ್ತು ರಷ್ಯಾ ತಮ್ಮ ಸಾಂಪ್ರದಾಯಿಕ ವಿದೇಶಾಂಗ ನೀತಿಯಿಂದ ದೂರ ಸರಿದು, ಹೊಸ ಮಿತ್ರರನ್ನು ಜೊತೆಗೆ ಹೊಸ ಶತ್ರುಗಳನ್ನು ಹುಡುಕುವ ಕಾಯಕದಲ್ಲಿ ತೊಡಗಿವೆ.

-     
ಕೀರ್ತಿರಾಜ್

ಭಾರತದ ರಕ್ಷಣಾ ವ್ಯವಸ್ಥೆಯಲ್ಲಿ ಮತ್ತು ಶಸ್ತ್ರಾಗಾರದಲ್ಲಿ ರಷ್ಯಾದ ಪಾತ್ರ ಅಪಾರ. ಆದರೆ ಕಳೆದ ನಾಲ್ಕು ವರ್ಷದ ಭಾರತದ ರಕ್ಷಣಾ ವ್ಯವಸ್ಥೆಯ ತಂತ್ರಗಳನ್ನು ನೋಡಿದರೆ ಭಾರತ ನಿಧಾನವಾಗಿ ಅಮೆರಿಕಾದ ಶಸ್ತ್ರಾಸ್ತ್ರಗಳನ್ನು ಖರೀದಿಸುವತ್ತ ಆಸಕ್ತಿ ತೋರಿಸುತ್ತಿರುವುದು ಗಮನಾರ್ಹ. ಅದೇ ರೀತಿ ಪಾಕಿಸ್ತಾನ ತನ್ನ ಚಾರಿತ್ರಿಕ ವೈರಿ ರಷ್ಯಾದತ್ತ ವಾಲುತ್ತಿರುವುದೂ ಜಾಗತಿಕ ರಾಜಕಾರಣದಲ್ಲಿ ಗಮನಿಸಬೇಕಾದ ವಿಷಯವೇ. ಶಸ್ತ್ರಾಸ್ತ್ರಗಳ ವಿಷಯಗಳಷ್ಟೇ ಅಲ್ಲದೇ ಆರ್ಥಿಕ ಮತ್ತು ಇನ್ನಿತರ ರಾಜಕೀಯ ರಷ್ಯಾ ಮತ್ತು ಪಾಕ್ ಹತ್ತಿರವಾಗಿರುವುದು ಮತ್ತು ಕಮ್ಯುನಿಷ್ಟ್ ಚೈನಾ ಕೂಡ ಈ ಮೈತ್ರಿ ಕೂಟವನ್ನು ಸೇರಿಕೊಳ್ಳುವಲ್ಲಿ ಉತ್ಸುಕವಾಗಿರುವುದು ದಕ್ಶಿಣಾ ಏಷ್ಯಾ ಅದರಲ್ಲೂ ಪ್ರಮುಖವಾಗಿ ಭಾರತದ ರಾಜನೀತಿಜ್ಞರ ಪಾಲಿಗೆ ಯೋಚಿಸಬೇಕಾದ ವಿಷಯ.

ಅಮೆರಿಕಾ ಮತ್ತು ಸೋವಿಯೆತ್ ಯುನಿಯನ್ (ಇವತ್ತಿನ ರಷ್ಯಾ) ನಡುವಿನ ಶೀತಲ ಸಮರದ ಪ್ರಾರಂಭದಿಂದ ಕೊನೆಯವರೆಗೂ ಪಾಕಿಸ್ತಾನ ಅಮೆರಿಕಾವನ್ನು ಸ್ಪಷ್ಟವಾಗಿ ಬೆಂಬಲಿಸಿತ್ತು. ಅಮೆರಿಕಾ ನೇತೃತ್ವದ ಸೀಟೋ ಮೈತ್ರಿಕೂಟವನ್ನು ಸೇರಿಕೊಂಡ ಪಾಕಿಸ್ತಾನ ಏಷ್ಯಾದಲ್ಲಿ ಅಮೆರಿಕಾದ ಅತ್ಯಂತ ಆಪ್ತ ರಾಷ್ಟ್ರ ಎಂದು ತನ್ನನ್ನು ಬೆನ್ನನ್ನು ತಾನೇ ತಟ್ಟಿಕೊಂಡಿತು. 1965ರ ಯುದ್ಧದ ನಂತರ ತಾಷ್ಕೆಂಟ್ ಒಪ್ಪಂದದ ಸಂದರ್ಭದಲ್ಲಿ, ಸೋವಿಯೆತ್ ರಷ್ಯಾ ಪಾಕಿಸ್ತಾನ ಪರವಾದ ಒಪ್ಪಂದವೊಂದಕ್ಕೆ ಲಾಲ್ ಬಹಾದ್ದೂರ್ ಶಾಸ್ತ್ರಿಯವರನ್ನು ಒತ್ತಾಯಿಸಿದಂಥ ಕೆಲವೊಂದು ಉದಾಹರಣೆಗಳಿದ್ದರೂ ಭಾರತ ಮತ್ತು ಸೋವಿಯೆತ್ ರಷ್ಯಾದ ದೀರ್ಘಕಾಲೀನ ಬಾಂಧವ್ಯಕ್ಕೆ ಈ ವಿಷಯಗಳು ಅಡ್ಡಿಯಾಗಲಿಲ್ಲ.

1971 ರಲ್ಲಿ ಪೂರ್ವ ಪಾಕಿಸ್ತಾನ, ಪಶ್ಚಿಮ ಪಾಕಿಸ್ತಾನದ ವಿರುದ್ಧ ದಂಗೆಯೆದ್ದಾಗ ಭಾರತ ಪೂರ್ವ ಪಾಕಿಸ್ತಾನಕ್ಕೆ ಸಂಪೂರ್ಣ ಬೆಂಬಲ ನೀಡಿ ಬಾಂಗ್ಲಾದೇಶದ ಉದಯಕ್ಕೆ ಕಾರಣಿಭೂತವಾಯಿತು. ಬಾಂಗ್ಲಾದೇಶೀ ವಿಮೋಚನೆಯ ಈ ಯುದ್ಧದಲ್ಲಿ ಅಮೆರಿಕಾ ಪಾಕಿಸ್ತಾನಕ್ಕೆ ಸಹಾಯ ಹಸ್ತ ನೀಡಿದ್ದಲ್ಲದೆ, ಬೆಂಬಲದ ಕುರುಹಾಗಿ ಯು .ಎಸ್.ಎಸ್ ಎಂಟರ್ಪ್ರೈಸ್ ಎಂಬ ಬೃಹತ್ ಯುದ್ಧ ನೌಕೆಯನ್ನು ಬಂಗಾಳ ಕೊಲ್ಲಿಗೆ ಕಳುಹಿಸಿಕೊಟ್ಟಿತು. ಆ ಸಂಧಿಗ್ಧ ಪರಿಸ್ಥಿತಿಯಲ್ಲಿ ಸೋವಿಯೆತ್ ರಷ್ಯಾ ತನ್ನ ನೌಕಾಬಲವನ್ನು ಭಾರತದ ನೆರವಿಗೆ ಕಳುಹಿಸಿ, ೧೯೭೧ರ ಯುದ್ಧದಲ್ಲಿ ಅಮೆರಿಕಾವನ್ನು ತಟಸ್ಥಗೊಳಿಸಿದ್ದು ಈಗ ಇತಿಹಾಸ. ಇದಕ್ಕೆ ಕಾರಣ ಅಂದಿನ ಪ್ರಧಾನಿ ಇಂದಿರಾ ಗಾಂಧಿ ಸೋವಿಯೆತ್ ಜೊತೆ ಮಾಡಿಕೊಂಡಿದ್ದ ರಕ್ಷಣಾ ಒಪ್ಪಂದ.

ಮುಂದೆ 1979ರಲ್ಲಿ ಅಫ್ಘಾನಿಸ್ತಾನವನ್ನು ಸೋವಿಯೆತ್ ಆಕ್ರಮಿಸಿಕೊಂಡ ಸಮಯದಲ್ಲಿ, ಅಮೆರಿಕಾ ಮುಜಾಹಿದ್ದೀನ್ ಗಳನ್ನು ಸೋವಿಯೆತ್ ಪಡೆಗಳ ವಿರುದ್ಧ ಎತ್ತಿಕಟ್ಟಿತ್ತು. ಶೀತಲ ಸಮರದ ಈ ಅಧ್ಯಾಯದಲ್ಲಿ ಪಾಕಿಸ್ತಾನ ಸೋವಿಯೆತ್ ವಿರುದ್ಧ ಹೋರಾಡುವಲ್ಲಿ ಪ್ರಮುಖ ಪಾತ್ರವಹಿಸಿತು. ಅಫ್ಘನ್ ನಿರಾಶ್ರಿತರಿಗೆ ಆಶ್ರಯ ನೀಡುವುದರಿಂದ ಹಿಡಿದು, ಮುಜಾಹಿದ್ದೀನ್ ಗಳಿಗೆ ಸೋವಿಯೆತ್ ವಿರುದ್ಧ ನೀಡಿದ ಸಹಾಯ ಪಾಕ್ ಮತ್ತು ಸೋವಿಯೆತ್ ರಷ್ಯಾದ ವೈರತ್ವಕ್ಕೆ ನಿದರ್ಶನ. ಶೀತಲ ಸಮರೋತ್ತರದಲ್ಲಿ, ಸೋವಿಯೆತ್ ಒಡೆದು ಹೋಳಾಗಿ ರಷ್ಯಾ ಮಾತ್ರ ಉಳಿದುಕೊಂಡಿದ್ದರೂ, ಭಾರತದೊಂದಿಗಿನ ಸಂಬಂಧಗಳು ಉತ್ತಮ ರೀತಿಯಲ್ಲೇ ಮುಂದುವರಿದಿದ್ದವು. ಅಮೆರಿಕಾ ಪಾಕಿಸ್ತಾನದ ಪರವಾದರೆ, ರಷ್ಯಾ ಭಾರತದ ಪರ ಎಂಬ ಸಾಮಾನ್ಯ ನಂಬಿಕೆ ಬೇರೂರಿಬಿಟ್ಟಿತ್ತು.

ಆದರೆ 2011ರಿಂದೀಚೆಗೆ ಜಾಗತಿಕ ರಾಜಕಾರಣ ತನ್ನ ದೀರ್ಘಕಾಲಿಕ ಏಕತಾನೀಯ ದಿಕ್ಕು ಬದಲಿಸಿ, ಹೊಸ ದಿಕ್ಕಿನತ್ತ ಸಾಗಲಾರಂಭಿಸಿದೆ. 2011ರಲ್ಲಿ ಪಾಕಿಸ್ತಾನದ ಪೂರ್ವಾನುಮತಿ ಇಲ್ಲದೇ ಅಮೆರಿಕನ್ ಯೋಧರು ಅಬಟ್ಟಬಾದ್ ಗೆ ನುಗ್ಗಿ ಲಾದನ್ ಹತ್ಯೆ ಮಾಡಿದರು. ಇದಾದ ನಂತರ ಪ್ರಾರಂಭವಾದ ಮಾಧ್ಯಮ ಸಮರದಲ್ಲಿ, ಅಮೆರಿಕನ್ ಮಾಧ್ಯಮಗಳಾದ ನ್ಯೂಯಾರ್ಕ್ ಟೈಮ್ಸ್, ದ ಅಟ್ಲಾಂಟಿಕ್ ಪಾಕ್ ಮಾನವ ಹಕ್ಕುಗಳ ಉಲ್ಲಂಘನೆ, ಉಗ್ರರಿಗೆ ನೆರವು ನೀಡಿದ ಕೃತ್ಯಗಳ ಬಗೆಗೆ ಬೆಳಕು ಹರಿಸಿದ್ದವು. ಇಂಥ ಘಟನೆಗಳು ಅಮೆರಿಕಾ ಪಾಕ್ ಸಂಬಂಧ ಹದಗೆಡಿಸಿದ್ದು ನಿಜವಾದರೂ ನಂತರ ಪಾಕ್ ಅಮೆರಿಕಾ ಸಂಬಂಧಗಳನ್ನು ಯಥಾಸ್ಥಿತಿಗೆ ತರುವ ಪ್ರಯತ್ನಗಳೂ ನಡೆದವು.

ಇವೆಲ್ಲವುಗಳ ಮಧ್ಯೆ ಪಾಕಿಸ್ತಾನಿ ರಾಜಕಾರಣಿಗಳು, ಅಮೆರಿಕಾದ ಅತಿಯಾದ ಅವಲಂಬನೆಯನ್ನು ತೊರೆದು ಇನ್ನಿತರ ಶಕ್ತಿಶಾಲಿ ಮಿತ್ರರ ಅವಶ್ಯಕತೆಯ ಬಗೆಗೆ ಯೋಚಿಸುವಂತಾಗಿತ್ತು. ಅತ್ತ ರಷ್ಯಾ ಕೂಡ ಇಂಥದ್ದೊಂದು ಅವಕಾಶದ ನಿರೀಕ್ಷೆಯಲ್ಲಿತ್ತು. ರಷ್ಯಾ ಉಕ್ರೇನ್ ಆಕ್ರಮಿಸಿದ ನಂತರ ಅಂತರಾಷ್ಟ್ರೀಯ ದಿಗ್ಬಂಧನಕ್ಕೊಳಗಾದ ಮೇಲಂತೂ ರಷ್ಯಾ ತನ್ನ ಆರ್ಥಿಕ ಚಟುವಟಿಕೆಗಳಿಗೆ ಹಾಗೂ ಮಾರುಕಟ್ಟೆಗಳಿಗೆ ಏಷ್ಯಾದತ್ತ ಮುಖ ಮಾಡಿತು. ಭಾರತದ ತೀವ್ರ ವಿರೋಧದ ನಡುವೆಯೂ, ತನ್ನ ಶಸ್ತ್ರಾಸ್ತ್ರಗಳ ಮಾರುಕಟ್ಟೆಯನ್ನು ಪಾಕಿಸ್ತಾನಕ್ಕೂ ವಿಸ್ತರಿಸಿತು. ಮಿ-35 ಹೆಲಿಕಾಪ್ಟರ್ ಗಳಿಂದ ಸುಕೋಯ್ ಸು-35 ಫೈಟರ್ ಜೆಟ್ ಮತ್ತು ಯಾಕ್-130 ಕಾಂಬ್ಯಾಟ್ ಟ್ರೈನರ್ ಏರ್ ಕ್ರಾಫ್ಟ್ ಗಳಂಥ ಶಕ್ತಿಶಾಲಿ ತಂತ್ರಜ್ಞಾನಗಳನ್ನು ಪಾಕಿಸ್ತಾನಕ್ಕೆ ಒದಗಿಸಲು ರಷ್ಯಾ ಕಡೆಯಿಂದ ಮಾತುಕತೆಗಳು ನಡೆದಿವೆ ಎಂಬುದು ಭಾರತದ ಪಾಲಿಗೆ ಎಚ್ಚರಿಕೆಯ ಘಂಟೆಯೇ ಸರಿ.

ಈ ಎಲ್ಲಾ ಬೆಳವಣಿಗೆಗಳ ಪರಿಣಾಮವಾಗಿ ಭಾರತದ ರಕ್ಷಣಾವಲಯದಲ್ಲಿ ಇರಿಸು ಮುರಿಸು ಉಂಟಾಗಿದ್ದು ನಿಜವೇ ಆದರೂ, ಇಂಡೋ-ರಷ್ಯಾ ಸಂಬಂಧಗಳು ಉತ್ತಮವಾಗಿಯೇ ಮುಂದುವರಿಯುತ್ತಿದೆ. ಪಾಕಿಸ್ತಾನದೊಂದಿಗಿನ ರಷ್ಯಾದ ಈ ಹೊಸ ನಡೆಯನ್ನು ಭಾರತ ಯಾವ ರೀತಿ ಸ್ವೀಕರಿಸುತ್ತದೆ ಎಂಬುವುದರ ಮೇಲೆ ಮುಂದಿನ ವಿದೇಶಾಂಗ ನೀತಿ ನಿರ್ಧರಿತವಾಗುತ್ತದೆ. ರಷ್ಯಾ-ಚೈನಾ-ಪಾಕ್ ಮೈತ್ರಿಯ ದಟ್ಟ ಸಾಧ್ಯತೆಯ ಬಗೆಗೂ ಚರ್ಚೆಗಳಿವೆ. ಇನ್ನೊಂದು ದಿಕ್ಕಿನಲ್ಲಿ ಭಾರತಕ್ಕೆ ಹತ್ತಿರವಾಗುತ್ತಿರುವ ಅಮೆರಿಕಾ ಮತ್ತಿತರ ರಾಷ್ಟ್ರಗಳು ಹೊಸ ಶಕ್ತಿ ಕೇಂದ್ರಕ್ಕೆ ಅಡಿಪಾಯ ಹಾಕಿದಂತಿದೆ. ಇವೆಲ್ಲವುಗಳ ಹಿನ್ನೆಲೆಯಲ್ಲಿ ಮುಂದಿನ ಡಿಸೆಂಬರ್ ನಲ್ಲಿ ನರೇಂದ್ರ ಮೋದಿಯವರ ರಷ್ಯಾ ಭೇಟಿ ಕುತೂಹಲಭರಿತ ಪ್ರಾಮುಖ್ಯತೆ ಪಡೆದುಕೊಂಡಿದೆ.

 

  

 KEERTHIRAJ  (keerthiraj886@gmail.com)

·   Currently serving as a Faculty for International Relations and Political Science at Alliance University, Bangalore. 

      (This article was published in Hosa Digantha newspaper on 20 October 2015)